Abstract

O amioga ma tulaga puipuia ua fa’afoeina lea e so’o se Iunivesite tau a’oa’oga e puipuia ai le va fealoa’i o le Iunivesite ma ona tagata a’oga ma tagata lautele e pei o le pepa e o’o mai i le taimi nei o lo’o fa’atumuina ma pasia e so’o se Iunivesite ae le i alu ese atu se tagata a’oga e faia sana su’esu’ega, e iai ona fa’afitauli. Muamua, e leai ni aiaiga a lenei pepa fa’ataga i mea fa’aleaganu’u. Lua, e le mafai e lenei pepa ona maua se fofo i le tele o fa’afitauli e aliali mai i le va o le tagata a’oga ma tagata o lo’o ia su’esu’ea ae maise lava pe a fa’apea o ou lava tagata e autu ai le su’esu’ega. O le autu o lenei tusitusiga o le fa’aalia lea o nisi o fa’afitauli mai le va’aiga ma le lagona a le tagata Samoa e auala mai i le fa’amatalaina o se su’esu’ega na ou faia mo se a ailoga feooloolo atu i luga. O le finau a lenei tusitusiga e fa’apea; e ui lava ina e tatau ma taua le pepa a le Iunivesite e fa’atagaina ai se tagata a’oga ona faia se su’esu’ega, i le aganu’u fa’aSamoa ma ona alumaga, e iai aiaiga i le aganu’u ua uma ona fa’atulagaina ma aiaia aua mea e tutupu mai. se tasi o auga o le fofoina o nei fa’afitauli ua uma ona fa’atulagaina ma aiaia lea e le upu fa’aSamoa mai anamua, o le ‘va tapuia’ i le‘feagaiaga’ a le tuagane ma le tuafafine. O le fa’amaoniga o le ‘va tapuia’ e le fa’amasinoina e le Iunivesite po’o seise lava fa’alopotopotoga. O lona fa’amaoniga e fa’amasinoina lea e le ‘va tapuia’ e tagata o le a su’esu’eina. O le a fa’aaogaina se su’esu’ega na ou faia e fa’amatala ai tulaga ma aiaiga ‘a’anoa ma le loloto o le aoga o le ‘va tapuia’